Instituti Kombëtar i Shëndetësisë Publike të Kosovës (IKShPK) ka njoftuar se Ministria e Shëndetësisë ka aprovuar rekomandimin e Komitetit Profesional Këshillues për Imunizim (KPKI) për zgjerimin e grup-moshave për vaksinim kundër Human Papilloma Virusit (HPV). Ky vendim është në përputhje me evidencën shkencore më të fundit dhe rekomandimet ndërkombëtare.
Vaksinimi synon rritjen e mbrojtjes ndaj infeksioneve me HPV, parandalimin e kancerit të qafës së mitrës dhe uljen e rrezikut nga kanceret e tjera të lidhura me virusin tek të dy gjinitë.
Grup-moshat e vaksinimit
• Vullnetar për të rinjtë deri në moshën 26 vjeç, të pavaksinuar më parë.
• Për personat 26-45 vjeç, vetëm me rekomandim të klinicistit, bazuar në vlerësimin individual të rrezikut dhe përfitimit.
• Rutinë për fëmijët 11-12 vjeç (nxënësit e klasës së gjashtë), sipas kalendarit të imunizimit.
Vaksina mbron nga tipet më të rrezikshme të virusit, redukton rrezikun e lezioneve para-kanceroze dhe kancereve, dhe është e sigurt kur merret para ekspozimit ndaj virusit.
Zgjerimi pritet të ulë rastet e kancerit të qafës së mitrës dhe kancereve të tjera, të shtrijë mbrojtjen për të rinjtë, të reduktojë kostot e trajtimit dhe të përmirësojë shëndetin e popullatës.
Vaksina është e disponueshme në të gjitha Qendrat Kryesore të Mjekësisë Familjare (QKMF) dhe Qendrat Rajonale të Shëndetësisë Publike në të gjithë vendin. IKShPK inkurajon prindërit dhe qytetarët të përfitojnë nga kjo mundësi.