Instituti Kombëtar i Shëndetësisë Publike të Kosovës (IKSHPK) ka njoftuar publikun mbi situatën epidemiologjike në vend, pas regjistrimit të 36 rasteve me fruth brenda periudhës dy mujore, nga 16 prilli deri më 15 qershor 2026.
Rastet e konfirmuara janë shpërndarë në disa komuna të Kosovës, ku përqendrimi më i lartë i të prekurve është evidentuar në Ferizaj me 10 raste, pasuar nga Prishtina me 8 raste dhe Kaçaniku me 6 raste. Të dhënat e publikuara nga instituti tregojnë gjithashtu shpërndarjen si më poshtë:
• Fushë-Kosovë: 3 raste
• Lipjan, Obiliq dhe Vushtrri: nga 2 raste secila
• Gjilan, Shtime dhe Deçan: nga 1 rast secila
Në përpjekje për të kufizuar përhapjen e sëmundjes, IKSHPK-ja ka rekomanduar që personat që shfaqin simptoma si temperaturë e lartë, skuqje të lëkurës, kollë, rrufë apo konjuktivit, të paraqiten menjëherë në institucionet shëndetësore më të afërta. Ekspertët theksojnë se fruthi karakterizohet nga një shkallë e lartë e kontagjiozitetit, duke përbërë rrezik për përhapje në komunitet.
Institucioni u ka bërë apel prindërve dhe kujdestarëve që të kontrollojnë statusin e vaksinimit të fëmijëve të tyre dhe të sigurojnë imunizimin nëpërmjet qendrave të mjekësisë familjare, në përputhje me kalendarin e rregullt. Sipas IKSHPK-së, vaksinimi mbetet masa më e sigurt dhe më efikase për mbrojtjen e shëndetit publik dhe parandalimin e kësaj sëmundjeje.