Gjatë periudhës nga 16 prilli deri më 3 gusht 2026, Instituti Kombëtar i Shëndetësisë Publike të Kosovës (IKShPK) ka konfirmuar gjithsej 99 raste me fruth në të gjithë vendin. Shifrat tregojnë një rritje të dukshme krahasuar me të njëjtën periudhë të vitit të kaluar, kur ishin raportuar 65 raste. Për krahasim, në periudhën 2021–2024, në vend ishin regjistruar gjithsej vetëm tri raste, të cilat ishin të importuara.
Sipas të dhënave të publikuara nga institucioni, shpërndarja e rasteve sipas komunave është si vijon:
• Prishtinë: 33 raste
• Fushë-Kosovë: 25 raste
• Ferizaj: 12 raste
• Kaçanik: 7 raste
• Drenas, Lipjan dhe Obiliq: nga 3 raste secila
• Gjilan, Skenderaj, Shtime dhe Vushtrri: nga 2 raste secila
• Deçan, Graçanicë, Podujevë, Shtërpcë dhe Viti: nga 1 rast secila
Në njoftimin e tij, IKShPK thekson se vaksinimi mbetet masa më efektive dhe më e sigurt për parandalimin e kësaj sëmundjeje. Instituti u ka bërë apel prindërve dhe kujdestarëve që të kontrollojnë statusin e vaksinimit të fëmijëve të tyre dhe të sigurojnë imunizimin e plotë sipas Kalendarit të rregullt të imunizimit në qendrat e mjekësisë familjare.
Qytetarët janë udhëzuar që, në rast të shfaqjes së simptomave të dyshimta, të paraqiten menjëherë në institucionet shëndetësore. Simptomat kryesore që kërkojnë vëmendje mjekësore përfshijnë temperaturën e lartë, skuqjen ose ndryshimet në lëkurë, kollën, rrufën dhe konjuktivitin.
Përditësime
Numri i rasteve të konfirmuara me fruth në Kosovë është rritur në 112, nga 99 të raportuara më parë. Instituti Kombëtar i Shëndetësisë Publike të Kosovës (IKShPK) konfirmoi regjistrimin e 50 rasteve të reja gjatë periudhës 10 korrik – 10 gusht. Autoritetet shëndetësore raportuan një mobilizim më të lartë për imunizim, duke regjistruar 147 fëmijë të vaksinuar me dozën MMR vetëm gjatë javës së fundit. IKShPK ka përditësuar gjithashtu hartën e shpërndarjes gjeografike, duke shtuar mbikëqyrjen në komunat më të prekura.
Klinika Infektive aktualisht po trajton 22 pacientë me fruth, të cilët ndodhen në gjendje klinike stabile. Grupmosha më e prekur mbetet ajo 1 deri në 2 vjeç. Të dhënat nga Qendra Kryesore e Mjekësisë Familjare në Prishtinë tregojnë se gjatë periudhës janar-gusht janë vaksinuar 2277 fëmijë (1-5 vjeç), 2800 nxënës të parashkollorit dhe 3200 nxënës të klasave të para.