Ministria e Sportit dhe Rinisë ka njoftuar vazhdimin e mbështetjes financiare për sportistët dhe trajnerët e kategorizuar, si pjesë e angazhimit të institucionit për fuqizimin e sportit dhe përkrahjen e drejtpërdrejtë të atyre që kontribuojnë në sukseset e Kosovës. Sipas njoftimit zyrtar, për 150 përfitues janë ndarë gjithsej 625,325 euro.
Nga kjo shumë totale, ndarja financiare është bërë si vijon:
• 96 sportistë kanë përfituar 448,150 euro.
• 54 trajnerë kanë përfituar 177,175 euro.
Sipas ministrisë, ky fond është shprehje e vlerësimit për punën, disiplinën dhe rezultatet e arritura nga sportistët dhe trajnerët, të cilët përfaqësojnë Kosovën në garat vendore dhe ndërkombëtare. Ky kontribut financiar synon të jetë një shtysë për përgatitjet e vazhdueshme dhe për arritjen e rezultateve edhe më të larta në të ardhmen. Institucioni ka theksuar se sukseset e këtyre individëve përbëjnë krenari për vendin, duke konfirmuar se do të vazhdojnë të qëndrojnë pranë tyre në rrugëtimin e tyre sportiv.
“Çdo rezultat nis me përkushtim, ndërsa çdo sukses ndërtohet me punë të palodhshme”, thuhet në njoftimin e ministrisë, e cila ka përcjellë urimet për sportistët dhe trajnerët në përmbushjen e qëllimeve të tyre të radhës.