Ministrja e Shëndetësisë dhe Mirëqenies Sociale Evis Sala po merr pjesë në sesionin e 79-të të Asamblesë Botërore të Shëndetësisë që po zhvillohet në Gjenevë.
Sesioni nisi me diskutime mbi mbrojtjen e fëmijëve nga rreziqet online dhe ndikimin e dhunës digjitale. Në memorialin kushtuar fëmijëve të humbur si pasojë e dhunës digjitale, një nismë e Organizatës Botërore të Shëndetësisë me pjesëmarrjen e dukeshës së Sussex Meghan Markle, ministrja Sala rikonfirmoi angazhimin e Shqipërisë për vendosjen e fëmijëve në qendër të politikave sociale.
Ajo deklaroi se Shqipëria është ndër vendet e para në Ballkanin Perëndimor që ka miratuar Planin Kombëtar të Veprimit për Garancinë Evropiane për Fëmijët, me fokus parandalimin dhe moslënien e asnjë fëmije pas. Ministrja theksoi se dhënia fund e dhunës ndaj fëmijëve kërkon guxim politik dhe bashkëpunim ndërkombëtar.
Shqipëria është pjesë e Këshillit të Kampionëve të OBSH-së. Gjatë eventit të organizuar nga Komisioni Pan-Europian për Klimën dhe Shëndetësinë, ministrja paraqiti prioritetet e Planit Kombëtar të Përshtatjes ndaj Ndryshimeve Klimatike 2026–2036, duke përfshirë forcimin e sistemeve të paralajmërimit të hershëm dhe kujdesit shëndetësor parësor.