Evis Sala, ministre e Shëndetësisë dhe Mirëqenies Sociale, mori pjesë më 18 prill në Kongresin Ndërkombëtar të Federatës Shqiptare të Gjinekologëve dhe Obstetërve. Ajo theksoi se shëndeti i gruas mbetet prioritet kombëtar, me ndikim të drejtpërdrejtë në mirëqenien e familjes dhe zhvillimin e qëndrueshëm të vendit.
Ministrja nënvizoi nevojën për përmirësimin e cilësisë së shërbimeve shëndetësore, shoqëruar me garantimin e aksesit të barabartë për të gjitha gratë. Kjo adreson pabarazitë ndërmjet zonave urbane dhe rurale, si dhe grupeve të ndryshme sociale.
Politikat shëndetësore, sipas saj, janë të orientuara drejt forcimit të kujdesit të integruar për nënën dhe fëmijën, rritjes së aksesit në shërbime cilësore, standardizimit të praktikave klinike sipas udhëzimeve ndërkombëtare dhe investimeve të qëndrueshme në infrastrukturë dhe burime njerëzore.
Një vëmendje e veçantë u është kushtuar programeve të kujdesit antenatal, depistimit të patologjive më të shpeshta dhe forcimit të shërbimeve neonatale. Këto janë elementë kyç për uljen e sëmundshmërisë dhe vdekshmërisë amtare dhe neonatale.
Duke u ndalur te sfidat, Sala theksoi nevojën për qasje më të avancuar dhe të integruar, përmes teknologjive të reja, rritjes së kapaciteteve profesionale dhe zhvillimit të qendrave të specializuara.
"Qeverisja moderne në shëndetësi kërkon vendimmarrje të bazuar në evidencë dhe partneritet të ngushtë me profesionistët, duke vlerësuar këtë kongres si një shembull konkret ku shkenca dhe politika bashkëveprojnë për zhvillim dhe qëndrueshmëri", deklaroi ajo.
Në këtë kuadër, ministrja njoftoi nisjen e projektit PRISMA, në kuadër të programit MATHERNA. Projekti zhvillohet ndërmjet Qeverisë Shqiptare, Qeverisë së Italisë, Rajonit të Lombardisë, ASST Fatebenefratelli Sacco dhe Agjencisë Italiane për Bashkëpunim për Zhvillim, për përmirësimin e shërbimeve shëndetësore.