Ministrja e Shëndetësisë dhe Mirëqenies Sociale, Evis Sala, mbajti fjalim në Kongresin e Dytë Ndërkombëtar të Shkencave Mjekësore në Tiranë më 24 prill.
Ajo vlerësoi kontributin e profesorëve të përkushtuar dhe studentëve të talentuar shqiptarë, të cilët besojnë në fuqinë e mjekësisë për t’i shërbyer shoqërisë dhe për të përmirësuar cilësinë e jetës.
Sipas saj, kërkimi shkencor në mjekësi, integrimi i inteligjencës artificiale dhe forcimi i komunikimit me pacientin përbëjnë shtyllat kryesore të një sistemi shëndetësor bashkëkohor. Këto elementë rrisin saktësinë dhe efikasitetin e shërbimeve, ndërsa marrëdhënia e besimit me pacientin garanton kujdes cilësor, të personalizuar dhe njerëzor.
"Kërkimi klinik nuk është më një zgjedhje, është një domosdoshmëri. Pikërisht përmes kërkimit ne përmirësojmë trajtimet, personalizojmë kujdesin dhe sigurojmë që pacientët tanë të përfitojnë nga zbulimet dhe provat më të fundit shkencore", u shpreh ajo.
Ministrja u ndal te risitë teknologjike, si diagnostikimi i hershëm, imazheria inteligjente, menaxhimi efikas i spitaleve dhe përmirësimi i përvojës së pacientit. Përtej teknologjisë, ajo nënvizoi rëndësinë e komunikimit të mirë me pacientin.
Në vizionin për shëndetësinë shqiptare, Evis Sala theksoi bashkëpunimin ndërmjet profesionistëve të shëndetit dhe inovacionit. "Detyra jonë është e qartë: të ndërtojmë një sistem shëndetësor ku mjekët, studiuesit dhe studentët shqiptarë të udhëheqin inovacionin këtu në vendin tonë; ku spitalet tona të bëhen qendra ekselence; dhe ku pacientët tanë të marrin kujdes të barabartë me standardet ndërkombëtare", deklaroi ajo.