Ministrja e Shëndetësisë dhe Mirëqenies Sociale, Evis Sala, në Konferencën Kombëtare të Profesionistëve të Shëndetësisë më 12 maj, në rastin e Ditës Botërore të Infermierëve, vlerësoi kontributin e infermierëve, mamive, teknikëve dhe profesionistëve të tjerë të kujdesit shëndetësor në forcimin e sistemit shëndetësor.
Ajo theksoi se roli i tyre është i pazëvendësueshëm për garantimin e kujdesit cilësor ndaj qytetarëve. "Sot, në një sistem shëndetësor që po transformohet me ritme të shpejta, roli i infermierëve, mamive, teknikëve dhe gjithë profesionistëve të kujdesit shëndetësor është më i rëndësishëm se kurrë. Ata garantojnë vazhdimësinë e kujdesit, sigurinë e pacientit dhe funksionimin e përditshëm të sistemit. Asnjë reformë, asnjë investim në infrastrukturë apo teknologji nuk ka vlerë të plotë pa profesionistët që i japin jetë sistemit me punën, përkushtimin dhe profesionalizmin e tyre", u shpreh Sala.
Ministrja u ndal te roli i teknologjisë dhe inovacionit për shërbim më cilësor dhe digjital, duke përmendur kartelat elektronike, inteligjencën artificiale dhe platformat digjitale. Megjithatë, ajo nënvizoi ruajtjen e dimensionit njerëzor në çdo hap të transformimit.
Sa i përket reformave, Sala deklaroi se objektivi kryesor është ndërtimi i një sistemi më modern, digjital, njerëzor, të besueshëm dhe pranë qytetarit. "Një sistem shëndetësor modern ndërtohet mbi profesionistë të motivuar, të trajnuar dhe të mbështetur. Prioriteti ynë mbetet investimi tek edukimi i vazhdueshëm, përmirësimi i kushteve të punës, modernizimi i praktikave të kujdesit shëndetësor, digjitalizimi i shërbimeve dhe krijimi i një sistemi që ndihmon profesionistin të fokusohet më shumë tek pacienti", tha ajo.