Në kuadër të sesionit të 70-të të Komisionit për Statusin e Grave (CSW70) në Organizatën e Kombeve të Bashkuara (OKB), ministrja e Shëndetësisë dhe Mirëqenies Sociale, Evis Sala, mori pjesë në eventin e organizuar nga Shqipëria dhe Zyra e OSBE-së për Institucionet Demokratike dhe të Drejtat e Njeriut (ODIHR), në partneritet me Poloninë. Tema e eventit ishte “Ligjet për Barazinë Gjinore si përshpejtues të pjesëmarrjes së barabartë dhe qeverisjes së ndjeshme ndaj gjinisë”.
Në fjalën e saj, Evis Sala theksoi se legjislacioni për barazinë gjinore nuk është instrument periferik i politikave publike, por shtyllë strukturore e qeverisjes demokratike dhe forcimit të institucioneve. Ajo u ndal te miratimi në vitin 2025 të Ligjit të ri për Barazinë Gjinore, i cili bazohet në më shumë se 15 vite përvojë zbatimi. Reforma adreson boshllëqet institucionale, përmirëson koordinimin ndërinstitucional dhe forcon qartësinë ligjore në politikat për barazinë gjinore.
Ligji ruan pragun minimal prej 30% përfaqësim të balancuar gjinor në organet e zgjedhura dhe të emëruara si detyrim ligjor. Ai synon arritjen progresive të barazisë së plotë gjinore si objektiv strategjik afatgjatë. Reforma siguron përputhje të plotë me acquis-in e Bashkimit Evropian për barazinë gjinore.
Sipas përvojës shqiptare, ministrja Sala vuri në dukje elementët kyç për efektivitetin e legjislacionit:
- Përfaqësimin e balancuar si kërkesë ligjore në institucionet publike;
- Integrimin e vlerësimit të ndikimit gjinor në procesin legjislativ;
- Forcimin e buxhetimit të ndjeshëm ndaj gjinisë në menaxhimin e financave publike;
- Përmirësimin e mekanizmave institucionalë të koordinimit dhe llogaridhënies.
Ajo nënvizoi gjithashtu rëndësinë e njohjes së punës së papaguar të kujdesit dhe punëve të shtëpisë si faktorë strukturorë.