Evis Sala, ministre e Shëndetësisë dhe Mirëqenies Sociale, zhvilloi të martën një bashkëbisedim me studentë dhe pedagogë të Fakultetit të Shkencave Sociale për Ligjin e ri “Për barazinë gjinore”. Takimi u mbajt në kuadër të javës së 8 Marsit.
Ajo vlerësoi përparimet e Shqipërisë, si 36% përfaqësim i grave në Kuvend dhe integrimi i buxhetimit të përgjegjshëm gjinor në rreth 10% të buxhetit kombëtar. Megjithatë, theksoi sfidat e mëdha, përfshirë hendekun gjinor në paga, pjesëmarrjen e ulët të grave në tregun e punës dhe ngarkesën disproporcionale të punës së papaguar.
“Barazia në letër nuk është barazi në jetë”, u shpreh ministrja, duke e cilësuar ligjin jo si rishikim teknik, por si zgjedhje politike për të vendosur barazinë gjinore në qendër të zhvillimit, demokracisë dhe mirëqenies. Ajo vlerësoi rolin e universiteteve në prodhimin e ideve dhe politikave për transformimin shoqëror.
Ligji zgjeron detyrimet për institucionet publike dhe sektorin privat, bën integrimin gjinor detyrim në hartimin e çdo politike publike, njeh për herë të parë punën e papaguar dhe ekonominë e përkujdesit si kontribut ekonomik real, si dhe parashikon kalimin gradual drejt 50% përfaqësimi për secilën gjini në vendimmarrje.
Sfida kryesore mbetet zbatimi. Ministria ka nisur hartimin e akteve nënligjore, forcimin e mekanizmave institucionalë dhe riorganizimin e Këshillit Kombëtar për Barazinë Gjinore.
Në përmbyllje, ministrja ftoi studentët të angazhohen me kërkim, analizë dhe debat publik, duke theksuar se barazia gjinore nuk është përballje mes grave e burrave, por lidhet me cilësinë e shtetit, zhvillimin ekonomik dhe dinjitetin njerëzor.
Në takim foli edhe përfaqësuesi i UN Women në Shqipëri, Michele Ribotta, i cili lidhi ligjin me procesin e integrimit në Bashkimin Europian dhe zgjerimin e mundësive për gratë dhe vajzat.