Ministrja e Shëndetësisë dhe Mirëqenies Sociale, Evis Sala, përfaqësoi Shqipërinë në Forumin e 11-të Botëror të Kancerit 2026, organizuar nga revista “The Economist”. Gjatë diskutimeve, ministrja vuri theksin te nevoja për një transformim të plotë të sistemeve shëndetësore për të garantuar akses të barabartë në trajtimin e sëmundjeve onkologjike.
Sipas Sala, mbijetesa e pacientëve nuk duhet të varet nga vendbanimi, ndaj strategjia shqiptare parashikon masa konkrete për fuqizimin e sistemit publik:
• Krijimi i Institutit Kombëtar të Kancerit, si qendër për kujdesin e integruar, kërkimin shkencor dhe edukimin;
• Decentralizimi i onkologjisë mjekësore përmes forcimit të njësive rajonale;
• Modernizimi i shërbimit kombëtar të radioterapisë;
• Harmonizimi i legjislacionit për barnat dhe pajisjet mjekësore me standardet e Bashkimit Evropian;
• Përshpejtimi i transformimit digjital për të përmirësuar koordinimin e kujdesit dhe sistemet e referimit.
Ministrja theksoi se suksesi i këtyre politikave do të matet përmes shpejtësisë së diagnozave, reduktimit të kohës së pritjes dhe një kujdesi më të koordinuar për qytetarët.