Ministrja e Administratës Publike dhe Vetëqeverisjes Lokale në qeverinë e udhëhequr nga Aleksandër Vuçiç, Snezhana Paunoviq, u shpreh në një intervistë për median serbe Kurir se, nëse do të kishte gëzuar lirinë e veprimit që kishte pasur Sllobodan Millosheviq, ajo do të kishte ndërmarrë veprime për të realizuar spastrimin etnik të Kosovës në vitin 1998.
"Për të metat dhe budallallëkun tonë, nëse do të kisha qenë e lirë si Millosheviqi, do ta kisha pastruar etnikisht Kosovën në vitin 1998", deklaroi ministrja.
Kjo deklaratë ka nxitur reagime të shumta, pasi rikthen në vëmendje traumën e konfliktit të armatosur në Kosovë. Gjatë periudhës 1998-1999, forcat ushtarake dhe paramilitare të Serbisë kryen fushatë dëbimesh masive dhe krime kundër popullsisë civile shqiptare. Sipas të dhënave, si pasojë e këtyre veprimeve, mbi 1 milion shqiptarë u dëbuan me forcë nga shtëpitë e tyre, ndërsa mijëra të tjerë u vranë ose u zhdukën.
Në qarqet politike dhe opinionin publik, qëndrimi i ministres Paunoviq është interpretuar si një formë glorifikimi e politikave të dhunshme të së kaluarës. Deri më tani, nuk ka pasur një reagim zyrtar nga autoritetet qeveritare në Beograd.