Blendi Gonxhja, ministër i Turizmit, Kulturës dhe Sportit, njoftoi miratimin e marrëveshjes mbi bashkëprodhimin kinematografik ndërmjet Qeverisë së Republikës Franceze dhe Këshillit të Ministrave të Republikës së Shqipërisë.
Marrëveshja synon nxitjen dhe lehtësimin e bashkëprodhimeve kinematografike ndërmjet subjekteve prodhuese të të dy vendeve. Ajo përcakton kushtet e pranimit të veprave në status bashkëprodhimi, përqindjet e kontributit financiar, si dhe kërkesat për pjesëmarrje artistike dhe teknike.
Veprat e pranuara konsiderohen vepra kombëtare në Shqipëri dhe Francë dhe përfitojnë të njëjtat avantazhe ligjore dhe financiare si prodhimet përkatëse kombëtare.
Marrëveshja parashikon procedura miratimi, lehtësi administrative, rregulla për prezantimin e bashkëprodhimit dhe krijimin e një komisioni të përbashkët për monitorimin e zbatimit të saj. Nënshkrimi i saj pritet së shpejti.
Lajmi u bë i ditur përmes postimit të Blendi Gonxhja-s në rrjetet sociale.