Një mjeke që punon në një spital në jug të Iranit i ka thënë Radios Farda të Radios Evropa e Lirë se forcat e sigurisë kanë bastisur spitale dhe kanë vrarë protestues të plagosur, në vazhdën e veprimeve kundër protestave mbarëkombëtare kundër regjimit.
Mjekja foli në kushte anonimiteti për shkak të frikës nga hakmarrja. Ajo deklaroi: “Ata vranë shumë [demonstrues], arrestuan shumë prej tyre, ndërsa shumë të tjerë janë në arrati”. “Gjendja është shumë e rëndë”, shtoi ajo. Radio Evropa e Lirë nuk ka mundur të verifikojë në mënyrë të pavarur pretendimet e saj.
Autoritetet iraniane kanë ndaluar internetin dhe bllokuar linjat telefonike. Megjithatë, dëshmi nga dëshmitarë okularë dhe video të verifikuara tregojnë përdorimin e municionit të vërtetë ndaj protestuesve në rrugë.
Të paktën 648 njerëz, kryesisht protestues, janë vrarë që nga fillimi i protestave më 28 dhjetor, sipas grupeve për të drejtat e njeriut. Këto grupe vlerësojnë se numri i vërtetë i viktimave mund të arrijë mijëra.
Spitalet në të gjithë Iranin, vend me rreth 92 milionë banorë, janë mbushur me të vdekur dhe të plagosur, sipas mjekëve dhe infermierëve. Një infermiere nga kryeqyteti Teheran u shpreh për Radion Farda: “Është një situatë e tmerrshme, pothuajse gjithçka është e mbyllur”. Ajo përmendi shumë raste me dëmtime në sy dhe shtoi: “Njerëzit thonë se nuk e duan këtë regjim. Po i vrasin të gjithë”.
Organizatat për të drejtat e njeriut kanë dokumentuar përdorimin e fishekëve metalikë nga armë gjahu. Forcat e sigurisë shënjestrojnë qëllimisht sytë dhe kokat e protestuesve.
Mjekja nga jugu i vendit tha se protestat kanë zbehur pas goditjes së autoriteteve në qytetet kryesore, përfshirë Teheranin.