Stafi mjekësor i Spitalit Rajonal të Durrësit ka njoftuar se pacienti Artan Andoni, 52 vjeç, gëzon gjendje të mirë shëndetësore pas një ndërhyrjeje të vështirë kirurgjikale. Kirurgu Naim Mediu sqaroi se operacioni është realizuar me sukses nga një ekip me përvojë mbi 30-vjeçare dhe pacienti aktualisht po mbahet nën vëzhgim në repartin e Terapisë Intensive (Reanimacion).
Sipas informacioneve, Artan Andoni i ishte nënshtruar një operacioni të parë në enët e gjakut më 29 qershor në Qendrën Spitalore Universitare “Nënë Tereza” (QSUT). Pas kësaj periudhe, pacienti ka pasur lëvizje të shpeshta nëpër institucione shëndetësore. Mjekët konfirmuan se 52-vjeçari është bartës i virusit HIV dhe përdorues i heroinës, ndërsa merr edhe trajtim me metadon. Sipas kirurgut Naim Mediu, këto rrethana shëndetësore nuk kanë ndikuar negativisht në ecurinë e operacionit të fundit, i cili u përqendrua në trajtimin e një defasirizimi të anësisë së majtë.
Ndërhyrja u vlerësua si një proces kompleks për shkak të historikut mjekësor të pacientit. Mjekët e spitalit të Durrësit kanë përgënjeshtruar kategorikisht raportimet e rreme që qarkulluan se pacienti kishte ndërruar jetë, duke theksuar se gjendja e tij pas interventit është e stabilizuar. Pacienti është i zgjuar dhe po monitorohet vazhdimisht nga stafi mjekësor. Pas vlerësimeve të mëtejshme, ai pritet të transferohet në pavion për të vijuar shërimin.
Përditësime
Spitali Rajonal i Durrësit bëri të ditur se ndërhyrja kirurgjikale ndaj Artan Andoni, 52 vjeç, u krye me sukses gjatë intervalit 14:00-16:00. Në një njoftim zyrtar, institucioni sqaroi se ka koordinuar veprimet me Shërbimin Social dhe Policinë e Shtetit, duke hedhur poshtë kategorikisht pretendimet se pacienti ishte lënë pa asistencë mjekësore.