Një paciente 37-vjeçare nga Mitrovica, e identifikuar si B. SH. (lindur më 1988), i është shpëtuar jeta në Spitalin e Përgjithshëm Sami Haxhibeqiri në Mitrovicë. Ajo u paraqit në Shërbimin Emergjent në gjendje jashtëzakonisht të rëndë, me parametra vitalë minimalë, vetëdije të çrregulluar dhe shenja të shokut hemorragjik për shkak të humbjes masive të gjakut.
Pas vlerësimit klinik të menjëhershëm, ekzaminimeve laboratorike dhe ultrasonografike, mjekët diagnostikuan një shtatzëni ektopike cornuale. Ky është një rast i rrallë, që paraqitet në 2-4% të shtatzënive jashtë mitrës dhe shoqërohet me gjakderdhje masive si dhe rrezik të lartë për jetën e pacientes.
Stafi i Shërbimit Emergjent, në bashkëpunim me ekipet e Kirurgjisë, Gjinekologjisë, Anestezionit dhe shërbimet mbështetëse, reagoi shpejt dhe në mënyrë të koordinuar. Ata kryen një laparotomi urgjente, ndërhyrje që rezultoi vendimtare për shpëtimin e jetës së pacientes.
Sipas njoftimit të spitalit, ky rast tregon përkushtimin profesional dhe kapacitetin e stafit për menaxhimin e situatave komplekse emergjente.
Përditësime
Dr. Mirjeta Binakaj, specialiste e emergjencës, kryesoi laparotominë urgjente në Spitalin Sami Haxhibeqiri. E asistuan infermierët Valdete Maliqi, Saranda Rexha dhe Basri Grepi, sipas burimeve spitalore.