Mjeku Anton Keçi, 53 vjeç, dhe vajza e tij Bora Keçi, 19 vjeçe, studente e Mjekësisë, humbën jetën në një aksident në aksin Lezhë-Kakarriq.
Dyshohet se ngjarja ka ndodhur në orët e pasdites së djeshme, por u konstatua vetëm në orët e vona të mbrëmjes së së shtunës. Familjarët, të shqetësuar për mungesën e kontaktit me ta, nisën kërkimet për të afërmit e tyre.
Gjatë një patrullimi në zonë, shërbimet e policisë gjetën automjetin e përmbysur në një kanal, ku ndodheshin trupat e pajetë të viktimave. Gjetja ishte e vështirë, pasi kanali ishte thuajse i padukshëm.
Sot familjarët hapën dyert e mortit në Lezhë.