Monika Kryemadhi u paraqit më 12 mars 2026 në Prokurorinë e Posaçme Kundër Korrupsionit dhe Krimit të Organizuar (SPAK), në zbatim të masës së sigurisë "detyrim paraqitjeje". Kjo ndodh si çdo të enjte.
Para hyrjes në ambientet e SPAK-ut, Kryemadhi, shoqëruar nga avokati Kujtim Cakrani, shkëmbeu batuta me gazetarët. Ajo tha: "Qenkeni të gjithë te protesta më duket. Sot pasdite kemi filmin, do vini sot. Sot është gjyqi im, imuniteti Belindës, protesta e opozitës, iftari kryeministrit, filmi im. Këta të gjithë pas meje vijnë".
Në një deklaratë tjetër, ajo shtoi: "Si është sot? Gjyqi im, imuniteti i Belindës, protesta e opozitës, iftari i kryeministrit dhe filmi im. Unë e kam fiksuar datën e para, të gjithë këta të tjerët pas meje. S’të lënë rehat! Super kopjaca!".
Kryemadhi hetohet në të njëjtin proces gjyqësor me ish-bashkëshortin e saj Ilir Metën. Akuzat përfshijnë korrupsion, pastrim parash dhe mosdeklarim të pasurisë. Masa e sigurisë për të është "detyrim paraqitjeje".