Shërbimi sekret izraelit Mossad po shton përpjekjet në rrnetet sociale për të kontaktuar popullsinë iraniane dhe për të rekrutuar kundër Republikës Islamike, në mes të luftës me Iranin.
Kryeministri izraelit Benjamin Netanyahu u bën thirrje iranianëve të marrin fatin në dorë dhe të ngrihen kundër regjimit. Një kanal i Mossad-it u hap në platformën Telegram në gjuhën persiane më 24 dhjetor, katër ditë para shpërthimit të protestave masive në Iran. Një lidhje drejt këtij kanali shfaqet në faqen zyrtare të Mossad-it, që konfirmon autenticitetin e tij, së bashku me llogari rekrutimi në Instagram, Facebook dhe LinkedIn në hebraisht, anglisht dhe arabisht.
Në krye të kanalit në Telegram vendoset mesazhi: “Mirë se erdhët! Nëse keni mbërritur deri këtu, ka gjasa që dëshironi të hyni në kontakt me ne. Jemi të kënaqur”. Ky mesazh pasohet nga udhëzime të detajuara për kontaktimin e sigurt përmes një agjenti bisedues ose faqes zyrtare. Kanali numëron rreth 48 mijë abonentë.
Më 6 mars, kanali publikoi mesazhin: “Vazhdoni të dërgoni raportet tuaja nga terreni. Ju jeni dëshmitarët e së vërtetës. Ne do të këmbëngulim deri në fitore!”. Në fillim të marsit, pas nisjes së bombardimeve izraelito-amerikane më 28 shkurt, u krijua llogari në X me emrin “Mossad Official”, që poston video të krijuara me inteligjencë artificiale. Një video tregon militantët e Basij-it duke ngritur sytë nga qielli, të frikësuar nga një sulm i mundshëm.
Gazetari izraelit dhe eksperti i inteligjencës Yossi Melman shpjegon se Mossad është specializuar në operacione të tilla për dekada, duke përshtatur mjetet dhe teknologjitë në dispozicion.