Qyteti i Kukësit është goditur nga një përkeqësim i motit, me reshje të forta shiu dhe breshër, të cilat kanë shkaktuar probleme në disa zona urbane.
Stuhia ka përfshirë pothuajse të gjithë qytetin. Sasia e madhe e ujit dhe breshërit ka çuar në përmbytje të disa rrugëve, duke vështirësuar qarkullimin e automjeteve në segmente të ndryshme rrugore.
Probleme të ngjashme janë shfaqur edhe në aksin rrugor Kukës–Prizren. Për shkak të mungesës së kanalizimeve anësore për largimin e ujërave, reshjet kanë shkaktuar dalje të ujit në sipërfaqen e rrugës, duke krijuar rrezik për drejtuesit e mjeteve.
Në kilometrin e tretë të këtij segmenti është regjistruar një rrëshqitje dherash, e cila ka bllokuar një nga korsitë e qarkullimit. Kjo situatë ka sjellë vështirësi shtesë për lëvizjen e automjeteve dhe ka kërkuar kujdes të shtuar nga drejtuesit.