Motoçiklistë nga vende të ndryshme realizuan sot një marsh solidarizues, i cili u nis nga pika kufitare e Vërmicës në orën 10:00 dhe përfundoi në sheshet qendrore të Prishtinës. Ky aktivitet u organizua nga MK “Veteranët e UÇK-së” – Zona Operative e Nerodimes dhe platforma “Liria Ka Emër”, si reagim ndaj procesit gjyqësor në Dhomat e Specializuara të Kosovës në Hagë.
Pas mbërritjes në kryeqytet, pjesëmarrësit parakaluan nëpër sheshet “Zahir Pajaziti” dhe “Skënderbeu”. Përmes këtij marshi, ata shprehën mbështetjen për ish-krerët e UÇK-së: Hashim Thaçi, Kadri Veseli, Jakup Krasniqi dhe Rexhep Selimi. Një përfaqësues i motoristëve deklaroi se do të vazhdojnë të mbështesin çdo protestë që synon kundërshtimin e asaj që ata e konsiderojnë si padrejtësi ndaj liderëve të tyre, duke kërkuar angazhim më të madh nga institucionet e Kosovës.
Organizatorët kanë njoftuar po ashtu se një protestë tjetër në Prishtinë është planifikuar për datën 1 tetor, nën thirrjen “Jo në emrin tim”. Pjesëmarrësit theksuan vendosmërinë për të vazhduar mbështetjen e tyre deri në sigurimin e drejtësisë për ish-drejtuesit e UÇK-së.