Përfaqësues të grupit të tifozëve Tifozat Kuq e Zi kanë bërë të ditur pjesëmarrjen e tyre në marshin protestues në mbështetje të vlerave të luftës së Ushtrisë Çlirimtare të Kosovës (UÇK). Përmes komunikatave të tyre, tifozët theksuan se ky marsh shërben si një qëndrim për historinë dhe sakrificën e atyre që luftuan për lirinë, duke u bërë thirrje qytetarëve që t'i bashkohen nismës në sheshin Skënderbeu.
Krahas tifozëve, edhe reperi Don Xhoni ka konfirmuar pjesëmarrjen e tij. Përmes postimeve në rrjetet sociale, artisti vlerësoi se procesi gjyqësor ndaj ish-krerëve të UÇK-së, përkatësisht Hashim Thaçit, Kadri Veselit, Jakup Krasniqit dhe Rexhep Selimit, ndikon drejtpërdrejt në vlerat e lirisë së vendit. Ai u ka bërë thirrje qytetarëve për mobilizim masiv, duke e cilësuar lirinë si vlerë pa çmim.
Organizimi vjen në një periudhë sensibilizimi për opinionin publik, pasi pritet që më 16 shtator Trupi Gjykues i Gjykatës Speciale të shpallë vendimin lidhur me këtë proces gjyqësor. Thirrjet për këtë marshim janë shtuar ditëve të fundit nga organizata të ndryshme dhe figura publike, me synimin për të mbrojtur trashëgiminë e luftës çlirimtare.
Përditësime
Qytetarët kanë nisur grumbullimin në lagjen Ulpiana të Prishtinës për t'iu bashkuar marshit për liri, i cili zyrtarisht do të fillojë në orën 14:00. Pjesëmarrësit po pajisen me flamuj dhe simbole kombëtare në prag të nisjes. Në turmë janë identifikuar qytetarë të ardhur nga diaspora, përfshirë delegacione nga Tetova, si dhe ish-pjesëtarë të Ushtrisë Çlirimtare të Kosovës (UÇK) që kërkojnë lirimin e krerëve të tyre.