Jose Mourinho foli me emocione për periudhën e tij te Benfica, duke theksuar se aty përjetoi një nga fazat më të lumtura të karrierës.
"Isha i lumtur çdo ditë. Në karrierën time, edhe pse fitova më shumë tituj në disa klube sesa te Benfica, nuk isha i lumtur çdo ditë. Por këtu te Benfica, me grupin tim, isha i lumtur çdo ditë. Pa përjashtim", deklaroi trajneri portugez.
Benfica e mbylli sezonin pa humbje, por përfundoi në vendin e tretë dhe nuk siguroi vendin në Ligën e Kampionëve. Pas ndeshjes së fundit, Mourinho komentoi ofertën e rinovimit që ka marrë nga klubi dhe vlerësimin pozitiv që i dha agjenti i tij Jorge Mendes.
Mourinho la të kuptohet se ka pasur kontakte me Real Madrid përmes agjentit, por nuk ka folur ende drejtpërdrejt me presidentin Florentino Perez. Ai shtoi se pret që këto kontakte të shndërrohen në bisedime të drejtpërdrejta gjatë javës së ardhshme.
"Dua kohë për të analizuar, menduar dhe vendosur vetë. Qetësi. Pas kësaj, do të shohim se çfarë do të ndodhë", përfundoi Mourinho.