Një roje sigurie 43-vjeçar u shpëtua nga ekipet e kërkim-shpëtimit në La Guaira, pasi kishte qëndruar për 8 ditë nën rrënojat e një qendre tregtare. Ndërtesa u shemb si pasojë e një serie tërmetesh të fuqishme që goditën rajonin. Sipas raportimeve, ai kishte mbetur i bllokuar në bodrumin e godinës që nga momenti i shembjes.
Pavarësisht kushteve tepër të vështira, si mungesa e ushqimit dhe ujit, ai arriti të mbijetonte deri në momentin kur u lokalizua. Autoritetet e kanë cilësuar shpëtimin e tij si një "mrekulli", duke theksuar se ai mund të jetë një nga të mbijetuarit e fundit të gjetur pas kësaj katastrofe.
Megjithatë, situata mbetet kritike në zonat e prekura nga fatkeqësia natyrore. Sipas të dhënave zyrtare, bilanci i viktimave ka kaluar shifrën prej 2 mijë personash, ndërsa operacionet e kërkim-shpëtimit vijojnë në rrethana të vështira për të gjetur rreth 50 mijë persona që raportohen ende si të zhdukur.