Ministri i Financave, Hekuran Murati, ka reaguar ndaj shpërndarjes së Kuvendit të Kosovës me dekret nga Osmani, duke e quajtur atë kundërkushtetues. Sipas tij, brenda afatit 60-ditësh të parashikuar nga Neni 82 i Kushtetutës, deputetët kishin ende kohë për të miratuar vendime të rëndësishme.
Murati ka renditur çështjet kryesore që mund të votoheshin:
- Marrëveshje ndërkombëtare në vlerë prej 121 milionë eurosh, të planifikuara për seancën e së premtes.
- Ligje të lidhura me Planin e Rritjes së Bashkimit Evropian për Kosovën, miratimi i të cilave do të lironte një pjesë të mjeteve nga paketa prej 882 milionë eurosh.
- Rishikimi i buxhetit.
- Ligje dhe reforma të tjera me rëndësi për vendin.
- Ndryshime kushtetuese për zgjedhjen e presidentit me votë direkte nga qytetarët.
- Mundësia për një marrëveshje konsensuale për presidentin, duke shmangur ngërçin institucional.
Në një postim në Facebook, Murati shkruan se me këtë dekret përfaqësuesve të popullit iu mohua e drejta për të kryer punën e tyre. Ai ngrit pyetjen pse u bë një veprim i tillë me nxitim.
Të enjten mbrëma, Kuvendi i Kosovës dështoi të zgjedhë presidentin, pasi nuk u plotësua numri i nevojshëm i deputetëve të pranishëm.