Ministri në detyrë i Financave, Hekuran Murati, ka prezantuar të dhënat mbi ecurinë e pagës mesatare në vend, duke iu referuar raportit më të fundit të Agjencisë së Statistikave të Kosovës (ASK). Sipas këtij raporti, paga mesatare bruto për vitin 2025 është regjistruar në nivelin e 713 eurove.
Duke bërë një krahasim me nivelin e pagave në fillim të mandatit në vitin 2020, ministri Murati theksoi se rritja totale është 53 për qind, që përkthehet në një shtesë prej 247 eurosh. Në krahasim, ministri vuri në dukje se në pesëvjeçarin paraardhës, përkatësisht periudhën 2014-2019, rritja e pagës mesatare ishte 18 për qind ose 74 euro.
Sipas vlerësimeve të paraqitura nga ministri, rritja e realizuar gjatë qeverisjes së Lëvizjes Vetëvendosje është tre herë më e madhe krahasuar me qeveritë e mëparshme, ato të Mustafës dhe Haradinajt. Murati u ka bërë thirrje mediave dhe analistëve që, në diskutimet e tyre, t'u referohen statistikave zyrtare të ASK-së për të garantuar informimin sa më të saktë të qytetarëve mbi ecurinë ekonomike të vendit.