Çmimi i naftës në Shqipëri u rrit më 19 mars 2026 me 10-14 lekë për litër, duke arritur në disa pika shitjeje nivelin 210-214 lekë për litër. Kjo rritje reflekton zhvillimet në tregjet ndërkombëtare, ku çmimi i naftës dhe gazit kërceu në 115-199 dollarë për fuçi, për shkak të sulmeve ndaj infrastrukturës energjetike në Lindjen e Mesme.
Katar bëri të ditur se sulmet me raketa nga Irani kanë dëmtuar një objekt kyç për eksportin e gazit të lëngshëm (LNG). Ky veprim erdhi pas paralajmërimeve të Teheranit për goditje ndaj objekteve energjetike në Katar, Arabinë Saudite dhe Emiratet e Bashkuara Arabe, si përgjigje ndaj bombardimeve izraelite ndaj një impianti përpunimi gazi në Iran.
Rritje në tregjet ndërkombëtare
Në bursa, nafta Brent për dorëzim në maj u rrit me rreth 11%, në 119.11 dollarë për fuçi, ndërsa nafta amerikane West Texas Intermediate (WTI) u rrit me 3%, në 99.29 dollarë për fuçi.
Çmimet e gazit gjithashtu u ngritën:
- Në qendrën holandeze TTF, me 24% në 68.22 euro për megavat/orë, megjithëse më pas u zbutën.
- Gazi natyror në SHBA, me 4.8% në 3.21 dollarë për milion njësi termike britanike.
- Benzina në SHBA për prill, me 4.8% në 3.25 dollarë, niveli më i lartë në gati katër vjet.
Situata në tregun shqiptar
Nga niveli 170-175 lekë për litër në fund të shkurtit, çmimi ka kaluar disa rritje, duke arritur 210 lekë sot. Operatorët e tregut shpjegojnë se taksat paguhen në bazë të çmimit Platts në ditën e nxjerrjes së mallit në treg, pavarësisht datës së blerjes.
Shoqata e Hidrokarbureve vlerëson se taksat mbi naftë, mbi 100 lekë për litër, përbëjnë gjysmën e çmimit total dhe ka kërkuar heqjen e taksës së qarkullimit.