Çmimi i naftës në pikat e pakicës në Tiranë ka arritur 182 lekë për litër në disa pika të operatorëve të mëdhenj. Kjo përbën rritje prej 7 lekë nga 175 lekë për litër që qëndronte para nisjes së sulmeve në Lindjen e Mesme. Ndryshimi u konstatua sot me anë të vëzhgimit në terren.
Operatorët Kastrati, Bolv dhe Elda kanë reflektuar rritjen. Në një pikë të Kastrati pranë tregut të Medresë, çmimi kaloi nga 175 lekë për litër në 182 lekë për litër. Te Elda, pas rritjes së mëparshme në 179 lekë për litër të mërkurën, çmimi u bë 182 lekë për litër, me shtesë 3 lekë. Edhe Bolv raporton 182 lekë për litër, me rritje 7 lekë.
Evolucioni i çmimeve në Shqipëri
Para sulmeve, çmimi 175 lekë për litër ishte i qëndrueshëm që nga tetori 2024, pra për më shumë se një vit. Rreth katër ditë pas sulmeve, të mërkurën, çmimi u rrit me 4 lekë në 179 lekë për litër në disa pika të Elda në Tiranë, ndërsa mbeti i pandryshuar në autostradë.
Rritja në tregjet ndërkombëtare
Rritja lokale pasqyron tendencat globale. Nafta Brent crude në bursë ka arritur 88.9 USD për fuçi, nga 65 USD para sulmeve. Nafta e rafinuar, sipas operatorëve, u bleu me 700 USD për ton të premten para sulmit, pastaj 900 USD për ton, dhe 1.150 USD për ton pas mbylljes së rafinerisë Ras Tanura në Arabinë Saudite për shkak të sulmit me dron.