Çmimi i naftës me pakicë në Shqipëri është rritur ndjeshëm këtë fundjavë për shkak të luftës në Lindjen e Mesme.
Në Elbasan, një litër naftë shitej deri në 195 lekë/litër të shtunën, nga 182-185 lekë/litër një ditë më parë, me rritje prej rreth 10 lekësh. Në Tiranë, çmimi ka kaluar nga 175 lekë/litër në 182-185 lekë/litër, me dy rritje brenda pak ditësh. Benzina ka çmime të ngjashme në të dy qytetet.
Tregtarët e karburanteve e lidhin rritjen me çmimet në bursat ndërkombëtare, të nxitura nga tensionet në Lindjen e Mesme. Disa burime ngrenë dyshime për abuzime nga distributorët, veçanërisht në Elbasan.
Qeveria shqiptare zhvilloi një takim me dyer të mbyllura me përfaqësues të kompanive të hidrokarbureve dhe disa ministra. Në mbledhje u diskutua ndikimi i situatës ndërkombëtare në tregun vendor. Deri tani nuk është marrë vendim për ndërhyrje në tregun e karburanteve.
Shtrenjtimi mund të ketë efekte zinxhir, duke rritur çmimet e energjisë elektrike dhe produkteve të shportës nëse konflikti përshkallëzohet.
Përditësime
Çmimi i naftës në Tiranë u rrit në 184 lekë/litër nga 182 lekë/litër një ditë më parë. Benzina shitet për 185 lekë/litër në Tiranë.