Nard Ndoka, kryetar i PDK-së, i ftuar në emisionin Off the Record, të moderuar nga Andrea Danglli në A2CNN më 25 mars 2026, foli për kodin zgjedhor, opozitën dhe reformën territoriale.
Ndoka deklaroi se opozita është problematike në aspektin institucional dhe nuk përmbush rolin e saj si pasqyër e qeverisë. Sipas tij, një pasqyrë e pastër do ta detyronte mazhorancën të reflektonte mbi defektet, por sot ajo është me mjegull dhe avull. Kjo situatë, sipas Ndokës, bën që qeveria të mos e shohë veten realisht dhe të duket e ngjashme me opozitën.
Duke u ndalur te kodi zgjedhor i ndryshuar në 2008, Ndoka u shpreh se ai është problematik dhe e bën pothuajse të pamundur për opozitën të vijë në pushtet, edhe në kushte normale ose me qeveri teknike. Ai theksoi se ka të drejtë morale ta thotë këtë, sepse në 2008 ka bërë grevë kundër miratimit të tij. Sistemi krijon pabarazi në votë dhe disbalanca në mandate midis qarqeve, si Fieri dhe Vlora, dhe është antikushtetues në disa raste.
Ndoka kritikoi gjithashtu reformën territoriale, duke e cilësuar si katrahurë që ka dyfishuar administratën në vend që ta zvogëlojë. Sipas tij, shpenzimet për rroga janë rritur më shumë se investimet dhe shërbimet për qytetarët, ndërsa shërbimet janë larguar nga popullsia.
Ai akuzoi opozitën për mungesë standardi në sjelljen politike, mungesë drafti të qartë dhe marrëveshje të fshehta, duke theksuar nevojën për moral në politikë bazuar në konsensus.