NASA ka bërë të ditur se asteroidi Apophis, i njohur si “Zoti i Kaosit” sipas perëndisë egjiptiane, do të kalojë pranë Tokës më 13 prill 2029. Ky trup hapësinor, me madhësinë e tre fushave të futbollit, do të jetë në largësi rreth 32 186 kilometra nga sipërfaqja e planetit, më afër se satelitët që orbitojnë në lartësi 35 000 kilometra nga ekuatori.
Shkencëtarët e NASA-s e klasifikojnë Apophis-in si asteroid potencialisht të rrezikshëm, por pas monitorimit të vazhdueshëm, ata konfirmojnë se objekti nuk paraqet kërcënim për Tokën për të paktën 100 vjetet e ardhshme. “Nuk ka rrezik për Tokën, për askënd apo asgjë që jeton në të, as për astronautët dhe satelitët në hapësirë”, deklaroi agjencia.
Ky kalim ofron një mundësi të rrallë për të studiuar nga afër një asteroid kaq të madh. NASA vlerëson se ngjarje të tilla ndodhin mesatarisht një herë në disa mijëra vjet dhe se ky do të jetë i pari që vëzhgohet me teknologjinë moderne. Njerëzit në Hemisferën Lindore mund ta shohin me sy të lirë, në varësi të kushteve të motit.
Apophis u zbulua më 19 qershor 2004 nga astronomët Roy Tucker, David Tholen dhe Fabrizio Bernardi në Observatorin Kombëtar Kitt Peak në Arizona.