Aktivistja serbe Natasha Kandiq foli përmes një lidhjeje direkte në emisionin „Rubikon” të televizionit Klan Kosova në lidhje me ekspozitën „Masakrat në Kosovë 1998-1999”. Kjo ekspozitë ka shkaktuar indinjatë të madhe publike për shtrembërim historie.
Kandiq theksoi rëndësinë e paraqitjes së fakteve të verifikueshme dhe të bazuara në dëshmi të sakta. Ajo deklaroi: „Është shumë e rëndësishme të zbulohen të dhëna të cilat janë me të vërtetë të verifikueshme dhe të cilat dëshmojnë njohurinë se çka nënkupton i burgosur, çka nënkupton kur është i privuar nga liria, çka nënkupton kur në një databazë, në një listë është i përmendur si të ishte ushtar”.
Ajo u shpreh kritike ndaj mënyrës së realizimit të ekspozitës, duke theksuar mungesën e një qasjeje profesionale në prezantimin e materialeve. „Ajo çfarë kam parë unë në atë ekspozitë, jo vetëm kur flasim për Dubravën, por edhe për rastet e tjera, ku ekziston një mosdije e plotë se si të bëhet një ekspozitë, pra të mos përqëndrohet në emra, por vetëm në numra. Në nivel elementar mund të vërehet se diçka e tillë është padije, pandjesi të vendoset që në burgun e Dubravës janë vrarë 48 persona të armatosur”, tha ajo.
Kandiq pyeti pse të organizohet një ekspozitë nëse nuk shqyrtohet mënyra se si kanë pësuar personat dhe kush është përgjegjës. „Sepse në Dubravë edhe në vende të ndryshme kanë ndodhur gjëra të tmerrshme” shtoi ajo.
Përditësime
Natasha Kandiq e akuzoi Shkëlzen Gashin për mosdije në ekspozitën për masakrat në Kosovë.
Sipas saj, as në Serbi nuk është thënë se të vrarët në Dubravë ishin të armatosur; ata u quajtën të burgosur politikë ose pjesëtarë të UÇK-së të privuar nga liria.
Ekspozita kërkon hulumtime të mëtejshme.