Ministrat e Mbrojtjes të vendeve aleate të NATO-s do të mblidhen më 12 shkurt 2026 në selinë e Aleancës në Bruksel, në kuadër të takimit të radhës ministror. Takimi do të drejtohet nga Sekretari i Përgjithshëm i NATO-s, Mark Rutte.
Në fokus të diskutimeve pritet të jenë mbështetja për Ukrainën, forcimi i mbrojtjes së krahut lindor të Aleancës, si dhe zbatimi i angazhimeve për rritjen e shpenzimeve të mbrojtjes. Në Samitin e NATO-s të vitit 2025 në Hagë, vendet aleate u angazhuan që deri në vitin 2035 të investojnë 5% të Prodhimit të Brendshëm Bruto (PBB) çdo vit në mbrojtje dhe siguri.
Ministrat do të vlerësojnë progresin e bërë që nga Samiti i Hagës, duke përfshirë përmbushjen e angazhimeve për rritjen e investimeve në mbrojtje dhe forcimin e prodhimit industrial të mbrojtjes. Ata do të diskutojnë përgatitjet për Samitin e ardhshëm të NATO-s në Ankara, i cili do të zhvillohet më 7-8 korrik 2026.
Gjithashtu, do të trajtohet mbështetja e vazhdueshme për Ukrainën, siguria e së cilës lidhet ngushtë me atë të Aleancës. Kjo do të diskutohet në një takim të Këshillit NATO-Ukrainë me Ministrin e Mbrojtjes të Ukrainës, Mykhailo Fedorov, dhe Përfaqësuesen e Lartë të Bashkimit Evropian, Kaja Kallas.
Ministrat pritet të shkëmbejnë pikëpamje mbi zbatimin e misioneve dhe aktiviteteve të udhëhequra nga NATO, përfshirë misionin KFOR në Kosovë, i cili është misioni më i gjatë dhe aktualisht më i madh i Aleancës. Ballkani Perëndimor mbetet lart në agjendën e NATO-s si rajon me rëndësi strategjike. Aleanca është e përkushtuar ndaj stabilitetit, sigurisë dhe bashkëpunimit në këtë rajon, duke mos lejuar krijimin e një vakumi sigurie.