NATO nis zyrtarisht misionin Roja e Arktikut në Bruksel

NATO-ja ka nisur zyrtarisht misionin Roja e Arktikut më 11 shkurt në Bruksel, me qëllim përmirësimin e pozicionit ushtarak të aleancës në rajonin e Arktikut.

Kjo nismë vjen pas tensioneve të fundit mes aleatëve Danimarkës dhe Shteteve të Bashkuara në lidhje me të ardhmen politike të Grenlandës. Disa diplomatë i thanë Radios Evropa e Lirë se një mision i tillë mund të shërbejë si rrugëdalje nga kriza në rritje.

Më herët, në një takim në Davos të Zvicrës midis presidentit të SHBA-së Donald Trump dhe sekretarit të përgjithshëm të NATO-s Mark Rutte, u ra dakord që aleanca të luajë rol më të madh rreth Grenlandës për të zmbrapsur ndërhyrjet e mundshme kineze dhe ruse në ishull dhe Arktik.

Gjatë një konference për shtyp në Bruksel, Rutte deklaroi se “për herë të parë do ta sjellim nën një komandë të vetme gjithçka që bëjmë në Arktik. Jo vetëm që do t’i shfrytëzojmë të gjitha kapacitetet që kemi, por do të shohim edhe se cilat janë boshllëqet dhe do t’i mbushim ato”. Ai shtoi se “këtë e bëjmë sepse kemi një ndjenjë të qartë se rusët dhe kinezët po bëhen gjithnjë e më aktivë atje”.

Në një komunikatë, komandanti suprem i forcave aleate të NATO-s për Evropë, Alexus Grynkewich, theksoi se misioni “vë në pah përkushtimin e aleancës për të mbrojtur anëtarët e saj dhe për të ruajtur stabilitetin në një nga zonat më të rëndësishme strategjikisht dhe më sfiduese mjedisore në botë”. Ai përmendi se misioni do të “shfrytëzojë fuqinë e NATO-s për të mbrojtur territorin tonë dhe për të siguruar që Arktiku dhe Veriu i Lartë të mbeten të sigurt”.

Deri tani nuk janë bërë publike detaje për numrin e shteteve të NATO-s të përfshira apo nivelin e trupave. Aleanca ka konfirmuar se misioni është shumëdimensional, duke përfshirë operacione ajrore, detare dhe tokësore.