Sekretari i Përgjithshëm i NATO-s, Mark Rutte, konfirmoi në një konferencë për media në Bruksel se aleanca ka nisur procesin e optimizimit të misionit të KFOR-it në Kosovë. Sipas tij, ndryshimi i numrit të trupave është pasqyrim i përmirësimit të qëndrueshëm të situatës së sigurisë në vend.
Rutte deklaroi se trupat do të reduktohen nga niveli aktual prej rreth 4.700 ushtarësh në një shifër që varion ndërmjet 3.000 dhe 3.500. Ky plan synon rikthimin e pranisë së aleancës në kapacitetet që ekzistonin përpara vitit 2023. Shefi i NATO-s e cilësoi këtë zhvillim si lajm pozitiv, duke theksuar se në janar të këtij viti është ndërprerë tashmë dislokimi i forcave rezervë, pas dy vjetësh rotacioni të vazhdueshëm.
Vendimi bazohet në rishikimin vjetor të kryer nga Komanda Supreme e Forcave Aleate në Evropë (SHAPE). Gjenerali i Forcave Ajrore të SHBA-së, Alexus G. Grynkewich, Komandant Suprem i Forcave Aleate në Evropë, deklaroi se kushtet aktuale ofrojnë mundësi për optimizimin e madhësisë dhe pozicionimit të forcave.
Sipas NATO-s, misioni do të vazhdojë të mbetet i përkushtuar ndaj mandatit të tij për garantimin e një ambienti të sigurt. Grynkewich ritheksoi se siguria e rajonit të Ballkanit Perëndimor mbetet strategjike për aleancën dhe se NATO do të sigurohet që të mos krijohet asnjë vakum sigurie gjatë këtij procesi të adaptimit të forcave në terren.
Përditësime
Shtetet e Bashkuara kanë konfirmuar rikonfigurimin e kontingjentit të tyre brenda misionit të KFOR-it, në përputhje me vendimin e NATO-s të datës 12 qershor për reduktimin gradual të forcave në Kosovë.
Sekretari i Përgjithshëm i NATO-s, Mark Rutte, ka njoftuar një rikonfigurim të misionit të KFOR-it në prag të takimit të ministrave të mbrojtjes në Bruksel. Zëdhënësi Martin O'Donnell sqaroi se aleanca po fokusohet në optimizimin e burimeve dhe garantimin e sigurisë, përtej numrit të thjeshtë të trupave. Misioni aktual numëron 4,657 personel, ku kontributin më të madh e japin Italia (907), SHBA (590), Hungaria (408), Turqia (382) dhe Gjermania (308).
Komanda Evropiane e SHBA-së (EUCOM) konfirmoi se riorganizimi i trupave amerikane në Kosovë do të kryhet në faza, bazuar në një vlerësim të detajuar të sigurisë në terren.
Sekretari i Përgjithshëm i NATO-s, Mark Rutte, ka rishikuar planin për reduktimin e trupave të KFOR-it në Kosovë, duke i dhënë përparësi forcimit të sigurisë në rajon. Aleanca theksoi se integrimi i mëtejshëm i Kosovës mbetet sfidues, kryesisht për shkak të mosnjohjes së shtetit nga disa vende anëtare.
Zyrtarët e NATO-s konfirmuan se plani për optimizimin e trupave të KFOR-it nuk ndryshon marrëveshjet ekzistuese të bashkëpunimit me Kosovën. Dislokimi i Forcës së Sigurisë së Kosovës (FSK) në veri mbetet i kushtëzuar nga protokollet në fuqi, të cilat kërkojnë miratimin paraprak të Komandantit të KFOR-it për çdo lëvizje të trupave.