Zëvendës Ndihmës Sekretari i Përgjithshëm për Partneritete në NATO, ambasadori Kevin Hamilton, mbajti një takim me gazetarë në Prishtinë, ku diskutoi situatën e sigurisë në Kosovë, zhvillimet rajonale dhe dialogun Kosovë-Serbi.
Hamilton u shpreh se situata aktuale në terren vlerësohet si e qëndrueshme dhe e sigurt. Ai shtoi se KFOR-i dhe NATO vazhdojnë të monitorojnë zhvillimet për të parandaluar çdo përshkallëzim të mundshëm, sidomos në prag të zgjedhjeve.
Lidhur me sulmin e vitit 2023 në Banjskë, zyrtari i lartë i NATO-s theksoi se Aleanca pret llogaridhënie të plotë. "Ata që organizuan dhe kryen sulmet duhet të përballen me drejtësinë", deklaroi Hamilton, duke shtuar se Serbia i di emrat e personave përgjegjës.
Ai nënvizoi se pa progres në këtë çështje, bashkëpunimi ndërmjet NATO-s dhe Serbisë nuk mund të avancojë. Sulmet ndaj pjesëtarëve të KFOR-it u cilësuan si të papranuesshme.
Hamilton ripohoi mbështetjen e NATO-s për dialogun e ndërmjetësuar nga Bashkimi Evropian.
Përditësime
NATO ka pezulluar thellimin e partneritetit me Serbinë derisa të ketë llogaridhënie për sulmin në Banjskë. Mesazhi iu dha udhëheqësve në Beograd. Rusia synon të nxisë pakënaqësi dhe përçarje në rajon. Mbi 90 pjesëtarë të KFOR-it u lënduan në protestat e 29 majit 2023 në Zveçan.