Zëvendësndihmës sekretari i përgjithshëm i NATO-s për partneritet, Kevin Hamilton, njoftoi se thellimi i partneritetit me Serbinë mbetet i pezulluar deri në sqarimin e incidenteve të vitit 2023 në veri të Kosovës.
Hamilton theksoi se NATO pret llogaridhënie dhe drejtësi për organizatorët dhe autorët e sulmeve. Ai tha se këto ngjarje ishin plotësisht të papranueshme dhe se mesazhi i tillë iu dha edhe udhëheqësve shtetërorë në Beograd.
Në shtator të vitit 2023, në Banjskë të Zveçanit, grupe të armatosura sulmuan policinë e Kosovës, duke vrarë një rreshter dhe duke plagosur dy të tjerë. Më 29 maj të po atij viti, gjatë protestave në veri, mbi 90 pjesëtarë të KFOR-it u lënduan.
Zyrtari i NATO-s u takua me udhëheqësit e KFOR-it dhe me kryeministrin në detyrë Albin Kurti pas një qëndrimi dy ditor në Kosovë. Ai shtoi se aleanca dëshiron një raport transparent me Serbinë, por pa lëvizje konkrete drejt partneritetit të përshtatur individual pa pasur drejtësi për incidentet.