Radmilla Shekerinska, zëvendëssekretare e përgjithshme e NATO-s, në një intervistë për agjencinë e lajmeve Beta, ka thënë se Aleanca pret që përgjegjësit për sulmin në Banjskë të dalin para drejtësisë. Kjo, sipas saj, synon të parandalojë përsëritjen e ngjarjes.
Ajo theksoi se kanë marrë garanci nga autoritetet në Beograd. “Ne morëm garanci ose një angazhim shumë të qartë nga autoritetet në Beograd se përgjegjësia do të përcaktohet dhe ky do të jetë qëndrimi ynë në të ardhmen”, u shpreh Shekerinska.
Shekerinska iu referua deklaratës së sekretarit të përgjithshëm të NATO-s, Mark Rutte, në një konferencë në Bruksel këtë javë. Rutte tha se ende pret përgjegjësi për ngjarjet në Kosovë dhe se presidenti serb i kishte premtuar se do ta përmbushte atë së shpejti.
Duke komentuar deklaratën e Rutte-s, Shekerinska vuri në dukje se kjo tregon se NATO pret nga autoritetet serbe të dalin me rezultate. Kur u pyet nëse kjo nënkuptonte mungesë rezultatesh deri tani, ajo u përgjigj se “Rutte prandaj po bën thirrje përsëri për përgjegjësi”.