Gjykata Themelore në Prishtinë e shpalli fajtore dhe e dënoi me 20 vjet burgim Nazmije Millakun, e akuzuar për vrasjen e kunatit të saj Xh.M.. Aktgjykimi u shpall të hënën nga trupi gjykues i kryesuar nga kryetari Gazmend Bahtiri dhe anëtarët Naser Foniqi e Sulltane Hoti. Gjykatësi Bahtiri deklaroi se e akuzuara është fajtore për veprën penale të vrasjes së rëndë.
Në dënimin me burgim i llogaritet koha e kaluar në paraburgim, e cila vazhdohet me aktvendim të veçantë. Nazmije Millaku obligohet të paguajë shpenzimet e procedurës penale: 200 euro për paushallin gjyqësor dhe 50 euro për Fondin për Kompensimin e Viktimave të Krimit.
Gjykata e liroi nga akuza për armëmbajtje pa leje, pasi kjo vepër penale nuk u provua. U urdhërua konfiskimi dhe shkatërrimi i armës. Pala e pakënaqur ka të drejtë ankese pas pranimit të vendimit në formë të shkruar.
Për kërkesën pasurore-juridike, e dëmtuara Suzana Millaku u udhëzua në procedurë të rregullt juridiko-civile. Në seancë ishte prezente vetëm Suzana Millaku, ndërsa munguan Nazmije Millaku dhe avokatja e saj Mirvete Hashani.
Sipas aktakuzës së Prokurorisë Themelore në Prishtinë, më 20 gusht 2024, në korridorin e përbashkët të shtëpive të tyre në Prishtinë, Nazmije Millaku ka privuar nga jeta kunatin Xh.M. në mënyrë të dinakshme dhe për motive të ulëta xhelozie. Ajo ndihej e parespektuar dhe e braktisur nga familjarët, duke menduar se i ndjeri kishte ndikim. E akuzuara ishte përgatitur duke përfunduar kursin për përdorimin e armëve të shkurtra, duke u certifikuar dhe duke blerë armë zjarri e municion.