Pas një beteje për jetën, 25-vjeçarja Ana Dyrmishi ka ndërruar jetë si pasojë e plagëve të marra nga zjarri që përfshiu hotelin Brooklyn në zonën e Lungomares në Vlorë. Ngjarja tronditëse ndodhi në orët e para të mëngjesit të datës 16 gusht.
Sipas të dhënave, viktima kishte pësuar djegie në rreth 85% të trupit. Pas ndihmës së parë mjekësore të ofruar në institucionet shëndetësore në Shqipëri, ajo u transportua drejt Turqisë për mjekim të specializuar. Megjithatë, pavarësisht përpjekjeve të stafit mjekësor, gjendja e saj mbeti kritike deri në momentin e ndarjes nga jeta. 25-vjeçarja jetonte me familjen në zonën e Shkozetit në Durrës.
Zjarri, shkaqet e të cilit mbeten objekt hetimi, shpërtheu në orët e hershme të mëngjesit, duke detyruar klientët e hotelit të ndërmerrnin masa të dëshpëruara për të shpëtuar. Sipas raportimeve, disa prej 6 personave të plagosur u detyruan të largoheshin nga godina duke u hedhur nga ballkonet e dhomave për t'u shpëtuar flakëve. Mes të lënduarve u raportuan edhe shtetas nga Kosova.
Përditësime
Grupi hetimor identifikoi si shkak të zjarrit në hotelin në lagjen '10 Korriku' një defekt teknik në prizën elektrike të frigoriferit të restorantit. Pronarja e strukturës hoteliere është identifikuar si shtetasja Manushaqe Abazi. Nga 6 personat e lënduar, autoritetet konfirmuan se 5 janë shtetas nga Kosova dhe 1 nga Rrësheni.
Trupi i pajetë i 25-vjeçares Ana Dyrmishi ka mbërritur në Durrës për ceremoninë e varrimit. I fejuari i saj, Arnaldo Kaçorri, ndodhet për trajtim mjekësor të specializuar në Itali, pasi pësoi djegie në 35% të trupit. Çifti po qëndronte në hotel për të festuar ditën e tyre të parë të fejesës kur shpërtheu zjarri.
Shteti shqiptar mbuloi të gjitha shpenzimet mjekësore për kurimin e 25-vjeçares në Turqi, ku ajo qëndroi për 10 ditë përpara se të ndërronte jetë. Ndërkohë, autoritetet shëndetësore sqaruan se dy prej personave të plagosur u transportuan në Spitalin e Traumës për shkak të dëmtimeve të marra nga hedhja nga lartësia e hotelit për t'i shpëtuar flakëve.