Aktori i njohur turk Serhat Mustafa Kiliç u nda nga jeta në moshën 51-vjeçare. Ai u gjet i pajetë në apartamentin e tij në lagjen Kağıthane të Stambollit, pasi nuk kishte pasur kontakt me të afërmit për dy ditë. E dashura e tij, Özlem E., e cila u shqetësua nga mungesa e komunikimit, shkoi në banesë dhe e gjeti aktorin të shtrirë në divan, duke njoftuar menjëherë forcat e rendit dhe ekipet mjekësore.
Në vendin e ngjarjes, ekipet mjekësore konfirmuan vdekjen e tij. Gjatë ekzaminimeve paraprake, u vunë re mavijosje rreth syve, si dhe në krahë e këmbë. Megjithatë, autoritetet theksuan se në trupin e aktorit nuk u gjetën plagë të hapura, prerje apo shenja të dukshme të dhunës fizike. Trupi është dërguar në morgun e varrezave Zincirlikuyu për autopsi.
Sipas dëshmisë së të dashurës së tij dhënë autoriteteve, Kiliç vuante nga limfoma. Disa media raportuan gjithashtu se ai kishte pasur probleme shëndetësore me gjëndrën tiroide, por deri më tani nuk ekziston një konfirmim zyrtar lidhur me shkakun e vdekjes. Menaxheri i aktorit, Tolga Çinkitaş, njoftoi se ceremonia përkujtimore do të mbahet sot, më 7 shtator, në orën 12:00, në skenën Muhsin Ertuğrul. Serhat Kiliç pritet të përcillet për në banesën e fundit në Ankara.
Aktori ishte i njohur për rolet e tij në seriale si Seksenler, Söz, Kuruluş Osman dhe Ezel.
Përditësime
Hetuesit zbardhën detaje të reja mbi rrethanat e vdekjes së aktorit në banesën e tij në lagjen Nurtepe, Kağıthane. Partnerja e ndjerit, Özlem Esmergül, deklaroi se e gjeti aktorin të ulur në kolltuk, duke menduar fillimisht se ai ishte në gjumë. Sipas raportimeve, në vendngjarje u gjetën sasi alkooli dhe substanca të dyshimta, ndërsa Esmergül mohoi kategorikisht përdorimin e drogës. Përtej limfomës, dosja mjekësore e Kiliç konfirmon se ai vuante nga hernia cervikale, tensioni i lartë dhe gastriti. Autoritetet kanë sekuestruar pamjet e kamerave të sigurisë që dokumentojnë hyrjen e aktorit në banesë para ngjarjes.
Partnerja e aktorit, Özlem Esmergül, bëri reagimin e saj të parë publik në rrjetet sociale, duke sqaruar se nuk kishte pasur kontakt me Serhat Mustafa Kiliç që prej së enjtes, 5 shtator. Aktori Şoray Uzun u bëri thirrje qytetarëve dhe mediave të ndalojnë spekulimet lidhur me shkaqet e vdekjes, duke theksuar se duhet pritur përfundimi i hetimeve zyrtare.