Ndahet nga jeta fotoreporteri italian Luca Turi

Në moshën 82-vjeçare është ndarë nga jeta fotoreporteri italian Luca Turi. I lindur në Bari, Turi i kushtoi rreth pesë dekada karrierës së tij profesionale dokumentimit të zhvillimeve shoqërore, tragjedive dhe ndryshimeve historike në Bari dhe rajonin e Pulias. Ai ka qenë gjithashtu bashkëpunëtor i agjencisë italiane të lajmeve ANSA. Ndër punët e tij më të spikatura mbeten fotografitë e realizuara më 8 gusht 1991, që fiksuan mbërritjen e anijes “Vlora” në portin e Barit, me rreth 20 mijë shqiptarë në bord. Këto imazhe janë shndërruar në dëshmi historike të eksodit shqiptar drejt Italisë. Përveç kësaj, Turi ka dokumentuar ngjarje të tjera të rëndësishme, si zjarri i vitit 1991 në Teatrin Petruzzelli, trazirat civile në Ballkan, krizën e firmave piramidale në Shqipëri dhe pasojat e tërmetit të nëntorit 2019 në Shqipëri. Kryetari i Bashkisë së Barit, Vito Leccese, e ka vlerësuar Turin si një dëshmitar autentik të historisë së afërt të qytetit dhe rajonit. Sipas tij, vështrimi i fotoreporterit do të mbetet pjesë e trashëgimisë qytetare të Barit. Turi, i cili në vitin 2020 u pajis me shtetësi shqiptare nga Presidenti Ilir Meta dhe në vitet e fundit jetoi në Durrës, la pas dy fëmijë, Lorenzon dhe Annadelian. Ceremonia e funeralit do të mbahet të hënën në kishën e San Rocco në Bari.