Policia e Sarandës zbardhi një ngjarje me të shtëna me armë zjarri në ajër, të ndodhur më 12 mars 2026, rreth orës 22:30, në rrugën "Panorama", lagjja nr. 1. Dyshohet se shtetasi Jurgen Lapa, 19 vjeç, dhe një shtetas i mitur, për motive të dobëta pas konflikteve të mëparshme me disa të rinj, kanë qëlluar në ajër për t'i kanosur ata. Sipas një burimi, sherri nisi për një parakalim me makinë.
Si rezultat i veprimeve të shpejta të Seksionit për Hetimin e Krimeve në Komisariatin e Policisë Sarandë, më 13 mars 2026 mbrëmja u ndaluan katër shtetas:
- Aleksandër Zervo
- Gramoz Adushi
- Aidi Basho
- Danjel Zbobo
Të gjithë 18 vjeç, banues në Sarandë, të dyshuar se kanë qenë në dijeni të ngjarjes dhe nuk e kanë kallëzuar krimin.
Gjatë këqyrjes së vendit të ngjarjes u sekuestruan si prova materiale 5 gëzhoja, disa aparate celularë dhe një automjet.
Jurgen Lapa dhe shtetasi i mitur janë shpallur në kërkim, ndërsa vijon puna për kapjen e tyre dhe zbardhjen e plotë të rrethanave.
Materialet iu referuan Prokurorisë Sarandë për veprat penale “Kanosja”, “Prodhimi dhe mbajtja pa leje e armëve luftarake dhe municionit”, “Prishja e qetësisë publike” dhe “Moskallëzimi i krimit”.