Shërbimet e Komisariatit të Policisë Sarandë arrestuan në flagrancë shtetasin Dorjan Ziflaj, 30 vjeç, banues në Vlorë, për veprën penale "Mbajtja pa leje dhe prodhimi i armëve, armëve shpërthyese dhe i municionit".
Ngjarja ndodhi në orët e para të mëngjesit të 24 prillit 2026, në lagjen nr. 4 të Sarandës. Policia kishte siguruar informacion se një shtetas lëvizte i armatosur me automjet në qytet. Bazuar në këto të dhëna, efektivët lokalizuan dhe ndaluan automjetin e drejtuar nga i dyshuari.
Gjatë kontrollit fizik ndaj Dorjan Ziflajt dhe kontrollit në automjet, u gjetën dhe sekuestruan në cilësinë e provës materiale:
• 1 armë zjarri pistoletë;
• 1 krehër me fishekë;
• Automjeti me të cilin lëvizte.
Këto veprime u ndërmorën në kuadër të kontrolleve intensive për parandalimin dhe goditjen e armëmbajtjes pa leje. Materialet procedurale iu referuan Prokurorisë së Sarandës për hetime të mëtejshme.