Pas një hetimi me metoda speciale, shërbimet e Komisariatit të Policisë Sarandë, në bashkëpunim me Njësinë e Sigurisë Publike Fier dhe Drejtoria e Forcës së Posaçme Operacionale e DPPSh-së, finalizuan operacionin e koduar "Mekanizmi".
I arrestuari, K. B., 31 vjeç, me precedentë të mëparshëm në fushën e narkotikëve, u ndalua gjatë kohës që po drejtonte automjetin e tij në tunelin e Skërficës. Gjatë kontrollit të ushtruar, policia zbuloi 4 armë zjarri të tipit pistoletë, të cilat ishin fshehur në dyshemenë e mjetit.
Sipas hetimeve paraprake, armët kishin hyrë në vendin tonë si pjesë të demontuara dhe ishin montuar në Shqipëri. Destinacioni final i armatimit dyshohet se ishte shitja për një grup kriminal që operon në qytetin e Sarandës.
Policia ka sekuestruar armët e zjarrit dhe automjetin si prova materiale. Aktualisht, hetimet janë duke vijuar nën drejtimin e Prokurorisë për të identifikuar bashkëpunëtorët e tjerë të përfshirë në këtë veprimtari kriminale.
Përditësime
Policia e Shtetit ka dhënë detaje shtesë mbi operacionin e koduar 'Mekanizmi':
• Identifikimi i 31-vjeçarit Kejdi Banaj si person i arrestuar në Sarandë, i cili u kap me 4 pistoleta.
• Arrestimi i Roberto Malocajt në Shkodër, ku gjatë kontrollit iu gjetën armë zjarri. Policia sqaron se ky rast është i izoluar dhe nuk ka lidhje me operacionin e zhvilluar në Sarandë.
Policia e Shtetit ka publikuar pamjet e operacionit "Mekanizmi" në Sarandë, ku u arrestua një 31-vjeçar. Përmes përdorimit të një droni, efektivët monitoruan lëvizjet e të dyshuarit deri në hyrje të një tuneli, ku u bë kapja e tij me 4 pistoleta në posedim.