Gjatë një operacioni policor të zhvilluar rreth dy javë më parë në aksin rrugor Kardhiq-Delvinë, efektivët e policisë ndaluan në Tunelin e Skërficës një automjet që drejtohej nga Kejdi Banaj. Gjatë kontrollit të detajuar të mjetit, nën tapicerinë e sediljes së pasagjerit, u gjet një qese e zezë plastike që përmbante 4 armë zjarri të llojit Glock.
Sipas dosjes hetimore, policia dispononte informacione se automjeti do të transportohej mbi një karrotrec drejt Sarandës. Gjithashtu, dyshohej se Banaj planifikonte të merrte rreth 500 gramë kokainë në qytetin e Lushnjës, e cila do të shitej në doza të vogla në qytetin bregdetar.
Në dëshminë e dhënë, Banaj ka deklaruar se 26-vjeçari E. S., të cilin thotë se e njeh prej 20 vitesh, i kishte kërkuar të udhëtonte drejt Sarandës për të gjetur një apartament për pushime. Sipas 31-vjeçarit, gjatë ndalimit në autostradë pranë Qafës së Kasharit, E. S. dhe kunati i tij kishin vendosur qesen e zezë në automjet, ndërsa ata vetë ishin larguar me një tjetër mjet.
Në seancën për caktimin e masës së sigurisë, Banaj ndryshoi pjesërisht versionin, duke deklaruar se është përdorues i lëndëve narkotike dhe se nuk ishte i vetëdijshëm për përmbajtjen e qeses. Ai theksoi se megjithëse dyshonte për sende të paligjshme, kishte menduar se bëhej fjalë për armë lodër. Gjykata e Sarandës vendosi masën e sigurisë Arrest në burg për Kejdi Banajn, ndërsa vijojnë hetimet për përfshirjen e personave të tjerë.
Përditësime
Hetimet për rastin e Kejdi Banajt, të arrestuar në Sarandë me katër pistoleta në makinë, kanë zbardhur detaje mbi lidhjen e tij me të shpallurin në kërkim, E.S. Banaj, i cili drejton një agjenci imobiliare në Astir, deklaroi se e njihte E.S. prej 20 vitesh, ndonëse nuk ishin takuar prej 4 vitesh. Sipas dëshmisë së tij, kontakti ishte iniciuar nga E.S., i cili kishte siguruar numrin e telefonit përmes babait të Banajt. Lidhur me transportin e armëve, Banaj pretendon se E.S. udhëtonte me bashkëshorten dhe fëmijën, të cilët i la në Elbasan para se të vijonte rrugën drejt Tiranës. I dyshuari po bashkëpunon me hetuesit, duke u dorëzuar kodin e celularit dhe duke ofruar informacione për bashkëpunëtorët e përfshirë në trafikun e armëve.