Specialistët e Sektorit për Hetimin e Krimeve të Rënda në Komisariatin e Policisë Sarandë finalizuan operacionin e koduar "Identifikimi". I ndaluari, shtetasi I. K., 21 vjeç, banues në fshatin Shëndëlli, akuzohet për veprat penale "Vrasja me paramendim", mbetur në tentativë, e kryer në bashkëpunim, dhe "Mbajtja pa leje dhe prodhimi i armëve, armëve shpërthyese dhe municionit".
Ngjarja për të cilën hetohet i riu ndodhi mëngjesin e datës 5 shkurt 2026, në vendin e quajtur "Kryqëzimi i Urës së Vrinës". Sipas hetimeve, i dyshuari në bashkëpunim me shtetasit G. T. dhe Xh. B., të cilët janë ende në kërkim, kishin vendosur lëndë plasëse në automjetin që drejtohej nga shtetasi M. Gj..
Gjatë kontrollit të banesës së të ndaluarit, policia gjeti dhe sekuestroi një armë zjarri pistoletë me municion luftarak, e cila do t'i nënshtrohet ekspertizës balistike. Autoritetet bënë me dije se operacioni për lokalizimin dhe kapjen e dy bashkëpunëtorëve të tjerë të përfshirë në këtë veprimtari kriminale vijon ende.