Autoritetet detare kanë vendosur ndalimin e lundrimit për mjetet e vogla lundruese dhe ato të peshkimit jashtë Gjirit të Vlorës më 8 maj 2026. Kjo masë zbatohet nga ora 08:00 deri në 22:00, për shkak të përkeqësimit të kushteve hidrometeorologjike në Gjirin e Vlorës dhe në det të hapur.
Sipas njoftimit zyrtar, priten erëra të forta në drejtim jug-juglindje me forcë deri në 6-7 ballë, shpejtësi 15-20 metra për sekondë dhe lartësi dallgësh nga 1.5 deri në 2.5 metra. Është ndaluar pajisja me leje nisjeje për këto mjetet që operojnë në det të hapur.
Autoritetet kanë bërë thirrje subjekteve dhe institucioneve detare të marrin masa për sigurimin e mjeteve në port dhe rritjen e gatishmërisë së ekuipazheve, me qëllim parandalimin e rreziqeve dhe situatave emergjente. Anijet e transportit ndërkombëtar detar do të vazhdojnë operimin normalisht sipas destinacioneve përkatëse.
Përmirësimi i situatës hidrometeorologjike për mjetet e vogla lundruese dhe ato të peshkimit parashikohet pas orës 22:00 të 8 majit 2026.