Kapiteneria e Portit Vlorë ka pezulluar pajisjen me leje-nisje për mjetet e vogla lundruese dhe ato të peshkimit që operojnë jashtë gjirit të Vlorës, në det të hapur. Vendimi është në fuqi nga ora 08:00 e datës 19 shkurt 2026 deri në orën 06:00 të datës 20 shkurt 2026.
Kushtet hidrometeorologjike të përkeqësuara parashikohen me erë në drejtim jug-juglindje, forcë 6-7 Bft, shpejtësi 15-20 m/s dhe lartësi dallgësh nga 1.50 deri 2.50 metra, duke filluar nga ora 09:00 e 19 shkurt 2026.
Autoritetet kërkojnë bashkëpunim nga subjektet dhe institucionet detare për:
• Sigurimin e mjeteve në port;
• Rritjen e gatishmërisë së ekuipazheve;
• Parandalimin e situatave të papritura për shkak të kushteve atmosferike.
Anijet e transportit ndërkombëtar detar dhe tragetet vazhdojnë të operojnë normalisht sipas destinacioneve. Përmirësimi i situatës pritet pas orës 06:00 të 20 shkurt 2026 për mjetet e vogla dhe të peshkimit.