Një ndërprerje e energjisë elektrike ka shkaktuar kaos në Portin e Vlorës, duke penguar procedurat e imbarkimit për një numër të madh udhëtarësh. Më konkretisht, procesi është pezulluar për rreth 700 pasagjerë dhe 180 automjete, të cilët kanë mbetur në pritje në ambientet portuale për shkak të vonesave.
Sipas informacioneve paraprake, ndërprerja e energjisë është shkaktuar nga një defekt i ndodhur gjatë punimeve që po kryhen nga Ujësjellësi në zonën përreth portit. Kjo situatë ka shkaktuar radhë të gjata dhe shqetësim tek udhëtarët që prisnin të vijonin udhëtimin e tyre.
Strukturat përkatëse dhe autoritetet ndodhen në zonë dhe po punojnë për riparimin e defektit, në mënyrë që shërbimet të rikthehen sa më shpejt në funksionim normal. Korrespondenti i Top Channel, Mikel Marsi, raporton se situata ka sjellë vonesa të ndjeshme në lëvizjen e trageteve, ndërsa pasagjerët janë detyruar të presin deri në rifillimin e procedurave.